Jambischer Senar

46.2 Pandolfo Collenuccio*

Esto: Tyrannus strangulavit impia

nimis, heu, apertum fraude Collenucium.

Illumne, o hospes, an magis se perdidit?

Sua ille vivit claritate in litteris

actaeque vitae nobili praeconio.

At iste tali morte vivens concidit,

quod nunc mori, ut nec vivere olim, non liceat,

illius utrumque praestruente gloria.

Proinde verum si tacere nolumus:

Non vim tyrannus intulit, sed passus est.

Quae laurea illi prorsus est clarissima.

20.2 Jacopo Ammannati Piccolomini*

Hic ille cardo et alpha litterariae

gloriae, Iacobus Papiensis, accubat

Pio parenti, homuncioni Sylvio.

Uterque quorum literis evectus est,

ille ad tiarae triplicis fastigium,

hic ad rubentis purpurae. In qua substitit

patri hoc libenter deferens, honoribus

ut praestet ipsi ceteris ac dotibus:

Pio parenti filius gratissimus.

5.2 Francesco Petrarca*

Qui tanta Etrusci carminis dulcedine

tamque aestuosis vexeris praeconiis

tuam puellam, ut nemo te non crederet

flagrare quantis nec vel Aetna incendiis.

Atqui idem amoris frigidus neglexeris,

quem spectat omnis amans, vel in tenebris scopum:

Amasse Lauram an lauream te dixerim?

Jambischer Senar abonnieren