Hexameter (daktylisch)

Conditur hic Baldus Francisci tegmine fultus,

doctorum princeps, Perusina conditus arce.

Hac sub mole iacent cineres ac ossa Ioannis,

mens sedet ante Deum meritis ornata laborum.

Mortalis vitae genitor Boccacius illi,

patria Certaldum, studium fuit alma poesis.

Iura monarchiae, superos, Phlegethonta lacusque

lustrando cecini, voluerunt fata quousque.

Sed quia pars cessit melioribus hospita castris

actoremque suum petivit felicior astris,

hic claudor Danthes patriis extorris ab oris,

quem genuit parvi Florentia mater amoris.

Scandere sidereas virtus si novit ad oras,

Candidus astra tenet in templo numen adorans.

Pontifici summo, regi populoque ducique

hic Ligurum secreta dedit laudatus ubique.

Miles eloquio clarus Graiisque Camenis

instructus Latium studiis ornavit amoenis.

Mundanis fessus curis et in aethere pulchro

elatus gelido linquit sua membra sepulchro.

Frigida Francisci lapis hic tegit ossa Petrarcae.

Suscipe, virgo parens, animam, sate virgine, parce

fessaque iam terris caeli requiescat in arce.