Si quis bene umquam meritus est de litteris,

is Leonardus erit.

Qui fluctuantes litteras Pelasgicas

exilioque vagas

iamiam futuras – scilicet Byzantii

sceptra premente Deo

late excitatis barbaris – Quiritium

primus ad arva vocans

septena duxit urbis ad palatia.

Unde statim Italiam

missis per omnem plurimis coloniis

Olim Pierides, olim Florentia mater

vivente risit Pogio.

Nunc tumulum hunc adit et donum pro carmine flores

fert proque risu lacrimas.

Quae nisi pro vera sat sint pietate, rogabit,

Arnus ministret ut suas.

Dum patriam laudat, damnat dum Pogius hostem,

nec malus est civis nec bonus historicus.

A gravibus potui studiis qui clarus haberi,

corrupi ingenium plus satis ipse meum.

Converti ad rixas animum nugasque facetas,

sed Cato quas nolit quasque Sabina legi.

Hac ego quaesivi vitam male sanus in herba,

heu, facit ad vitam sed nihil ista seges.

Vivo tamen, sed non aliter quam Herostratus ille:

Quaesita et parta est crimine vita meo.

Vos moneo, ingenio quicumque et ab arte…

Attica mella sapis, redoles quoque nectar ubique

tu, qui divino numine nomen habes.

Quod nisi dulce canis referens mysteria divum,

dulcius hoc certe est nectare et ambrosia.

Viximus ambrosia, sed enim concessimus Orco.

Nunc iterum caelo redditur ambrosia.

Qui legis hunc tumulum, legeres si scripta sepulti

possentque hic oculis nuda patere tuis –

quam fluit eloquio, quam dulciter afficit utque

nil nisi nectareum quolibet ore sapit –

divinus fieres nec quamlibet ante sciisses,

iurares dictum protinus ambrosium.

Quaerite, Pierides, alium, qui ploret amores,

quaerite, qui regum fortia facta canat.

Me pater ille ingens hominum sator atque redemptor

evocat et sedes donat adire pias.

Siste, hospes! Fas est cantus audire dearum.

Grata mora est, Musae nam loca sacra tenent.

Antoni monumenta vides: Hinc templa frequentant.

Ille fuit sacri maxima cura chori.

Illum saepe suis medium statuere choreis,

duxit compositos arte decente choros.

Saepe lyram cessit Clio, cessere sorores,

concinuit teneros voce manuque sonos.

Extinctum flevitque Aon flevitque Aganippe,

Qui molles elegos et regum gesta canebat,

sacra Panormitae contegit ossa lapis.