Frigida Francisci lapis hic tegit ossa Petrarcae.

Suscipe, virgo parens, animam, sate virgine, parce

fessaque iam terris caeli requiescat in arce.

Quis iacet hic multa formosus messe December?

Ingenium aestivae fertilitatis habet.

Quid non talis ager hac tempestate tulisset,

ingenia autumno quando fovente calent?

Quaerite, Pierides, alium, qui ploret amores,

quaerite, qui regum fortia facta canat.

Me pater ille ingens hominum sator atque redemptor

evocat et sedes donat adire pias.

Bessarion feci hunc tumulum, qui conderet ossa.

Venerat unde olim spiritus, astra petet.

Hunc Domiti siccis tumulum qui transit ocellis,

vel Phoebi ignarus vel male gratus homo est.

Intulit hic vatum caecis pia lumina chartis,

obstrusum ad Musas hic patefecit iter.

Hunc Verona tulit, docti patria illa Catulli,

huic letum atque urnam Roma dedit iuveni.

Lascaris in terra est aliena terra sepultus

nec nimis externam quod quereretur erat.

Quam placidam, o hospes, reperit, sed deflet, Achaeis

libera quod nec adhuc patria fundat humum.

Quisquis barbarus es rudisque Phoebi,

hoc saxum pedibus cave profanes,

quod sane eximium tegit Leonem

peius angue tuum genus perosum.

Nam Musis sacer est easque secum

vel hic in tumulo moratur oris

docti blanditiis vel ipse cum illis

indagat Clarios comes recessus.

Doctis multiiugam referre praedam

non raro unde solet: stupente Apelle

atque Vitruvio sagacitatem.

Sed quid te dubium morer? Leonem…

Hic, hic Marsilius notissimus ille Ficinus,

totius Ausoniae luxque decusque, iacet.

In parvo ingentes qui clausit corpore dotes,

immo non clausit, sed magis exseruit.

Quare etiam hac parva fama est augustior urna,

ni tamen haec potius, quem replet, orbis erit.

„Quis iacet hoc, hospes, tumulo?“ – „Quis?“ – „Summus Iason.“ –

„Ille ne Phrixeae vellere dives ovis?“ –

„Clarior hic illo longe est.“ – „Quisnam oro?“ – „Maynus,

excellens iuris gloria caesarei.

Non fuit hoc quisquam iuris consultior alter,

qui extinctum posset reddere ius melius.

Sed tamen hoc summi vetuit mens dia parentis

Caesaribus cupiens usque favere suis.

Te audiit, o nimium…