Jambischer Trimeter

129.1 Celio Calcagnini*

Asta, viator, non est morae dispendium!

Mortalitatis hoc memor nuperrime

sibi sepulchrum Caelius construxerat.

Quo doctiorem neminem Sol lampade,

quacumque spargit lumen, orbi viderat.

Eheu! Repente raptus hic est conditus;

cui sunt parem visura nulla saecula.

Hic gloriae, dum vixit, invidit suae

celans opes tantas avarus ingeni,

tot splendida eruditionis lumina,

quae maximo Alcida iubente principe,

vulgata densas different caligines,

quae passim oberrant sensibus legentium.

Iam abi, viator, et memento sedulo

praeclara tantum facta fata vincere.

123.1 Pietro Alcionio*

Charybdis illa et gurges, Alcyonius,

hic vivere, immo bibere postquam desiit,

exhalat altam exaestuando crapulam,

ut quam bibens, vivens volo, haud concoxerat.

Bustum frequentes obsidere vultures,

milvos et upupas noctuasque conspicis.

Innata queis est foeda vel voracitas

vel lucis odium vel cupido sordium.

Fuere in illo cuncta quae domestica,

ut illa oletum olens anima spurcissima

nunc iure talem sortiatur hospitem

Phoebo scelestam vindicante iniuriam,

qualem ipse sacris praebuit se literis.

120.1 Lodovico Maria Ricchieri (Coelius Rhodiginus)*

Ludovicus ille Coelius, domi et foris

Graece Latineque omnium doctissimus,

vivet perennis quodque paucis contigit,

vixit suaeque aeternitati interfuit.

100.2 Gasparo Contarini

Descripsit ille maximus quondam Plato

longis suorum ambagibus voluminum,

quis civitatis optimus foret status.

Sed hunc ab ipsa saeculorum origine

nec ulla vidit, nec videbit civitas.

At Contarenus optimam rem publicam

parvi libelli disputationibus

illam probavit esse, quam millesima

iam cernit aestas Hadriatico in mari

florere pace, litteris, pecunia.

67.5 Christophe de Longueil*

Antistes eloquentiae, magni nepos

Atlantis, admiratus ut Longolium est

artificibus fandi esse priscis non modo

parem, sed et maiorem, ait: „Praestantior

ut plurimum discipulus est didascalo.“

51.2 Filippo Beroaldo*

Philippus ille candor, ille et optimus

sophos iacet lapisque candidissimus

tegit, tegit Bononiae, Bononiae

iubar. Viator, asta et inspice, inspice.

Mane, mane, Philippus ille te obsecrat,

rogat, preceris omnibus sacrum omnibus,

qui iter dedit, dedit. Lapis quoque obsecrat,

preceris, ut rogi leves eum opprimant.

68.2 Giovanni Aurelio Augurelli*

Iocum vetustum refricans Aurelius

dum sperat aurum, luditur carbonibus.

Adhuc Leoni scribit auri prodigo,

iam certus artis, nempe, Chrysopoeiam:

Ut, quod minus collegit e carbonibus,

avidi Leonis eriperet e dentibus.

68.1 Giovanni Aurelio Augurelli

Aurelii Augurelli imago est, quam vides,

uni vacantis litterarum serio

studio et iocoso, dispari cura tamen:

Hoc, ut vegetior sic fieret ad seria,

illo, ut iocosis uteretur firmior.

36.2 Ermolao Barbaro*

Peregrine civis, nate in urbe et advena,

quicumque adoras templa Musarum sacra:

Huc in beatae, etsi occupatus, Ursulae

diverte. Cultum hinc a sinistra suspice,

inter sacratos hinc et inde praesules,

in purpurata veste nobilem virum.

Quid fronte prima iam ominaris maximum?

Viva haec imago est Hermolai Barbari!

Aciem sacrasti, ne profana videris,

candente felix aere lumen excute.

Jambischer Trimeter abonnieren