Dum patriam laudat, damnat dum Pogius hostem,

nec malus est civis nec bonus historicus.

Siren relicto Daunio

quaerebat, ubi consisteret,

diuque vagula devolans

accessit amnem lassula

Arni fluentis leniter.

Et commorata satis iter

parabat inceptum sequi.

Sed ecce! Dum vaga subvolat,

audit repente rem novam

novosque numeros et nova

carmina canentis Angeli.

Itaque statim in labra convolat

dulci lepore perlita.

„Et“, inquit, „hic libet agere,

Aurea Pierio texentem carmina filo

Pontanum ad doctae Parthenopes titulum

ut primum Pindo longe atque Helicone relicto

audiit arrecta Cynthius aure deus,

„Vicisti, Pontane“, inquit, „mea numina. Cedat

iam tibi et Eous, cedat et Hesperius.“

Maior in assumpto ratio quo nomine constet,

est ubi te cupiam fellis habere minus.

Suada, Venus, Nemesis, Charites, Sapientia, Musae

amplexae in cunis pectora Turrioli

pro se quisque sibi trahere et contendere. Verum

cum sors visque simul omnibus aequa foret,

Marte superveniente Venus: „Committimus“, inquit,

„uno assensu hominem iudiciumque tibi.“

Ille ferox gladium nudans: „Hoc vicimus. Aut vos

hunc mecum aut totus cesserit ergo mihi.“

Maesta Butuntinae duxerunt otia nymphae

nec faunis solitos exhibuere choros,

scilicet optato quicquid sine principe cernunt,

ingratum est, tantus principis urget amor.

Nec satis est positis arcum sprevisse sagittis

questubus et totos continuasse dies,

ast etiam nostris faciunt convicia terris

et nos Sirenas Lotophagosque vocant.

Vera loquor, divae, veniam date vera loquenti:

Qui paucos habeas pares, Erasme,

multorum invidiam feras necesse est.

Istos quod logodaedalos ab urbe –

unos prae reliquis – in immerentis

manes sic videam stili cruentam

stringentes aciem, perinde tamquam

stuprasses Charitum novem sorores –

indignum patria eruditione et

asserto titulo Elegantiarum.

Causam scire velim, quid urat illos

et quid tantopere tumultuentur.

Sed quid dissimulo? Sat…

Quod sis ultima pars, Iovi, libelli,

id fratris pietate et arte factum est,

ne vel carior aptiorve imago

olim quam tua iactet ulla sese

signasse hunc lepidissimum libellum.