Frigida Francisci lapis hic tegit ossa Petrarcae.

Suscipe, virgo parens, animam, sate virgine, parce

fessaque iam terris caeli requiescat in arce.

Qui tanta Etrusci carminis dulcedine tamque aestuosis vexeris praeconiis tuam puellam, ut nemo te non crederet flagrare quantis nec vel Aetna incendiis. Atqui idem amoris frigidus neglexeris, quem spectat omnis amans, vel in tenebris scopum: Amasse Lauram an lauream te dixerim?

Hac sub mole iacent cineres ac ossa Ioannis,

mens sedet ante Deum meritis ornata laborum.

Mortalis vitae genitor Boccacius illi,

patria Certaldum, studium fuit alma poesis.

Si quaeram cineres tuos, Bocaci:

hic iacent; si animam: petivit astra;

si, qua gloria sit tuis libellis

maior: non ego Lydiusve linguae

cultor patriae et aemulus Latinae,

sed iudex erit aut iocis Cupido

aut gaudens facili Venus loquela

aut, quem dicere malo, totus orbis,

cui vivunt Veneres Cupidinesque.

Quibus cultior est tuus libellus,

elegantior omnibus libellis.

Inter Avernales animam dum cogeret umbras

Cyllenius Bocacii,

„Ergo“, ait, „haec nostri spes est praeclara laboris

vestraeque gratitudinis?

Antea qui nulla vixistis lege dirempti

mixti nothi cum gnesiis,

in certam primus stirpem classesque redegi.

Secans minorum gentium

maiorumque tribus, ut sit cognoscere promptum

suos cuique posteros.“

…

Hic est Bartholus ille, iuris ingens

lux et commodus explicator, hic est,

quem Mors ante diem abstulit maligna.

Heu Mors invida et aevo iniqua nostro,

quae leges iterum iacere cogis.

Umquam si poterunt perire leges,

cum ipsis, Barthole, legibus peribis.

Ast si harum steterit perenne nomen,

non est, quod timeas mori perennis.

Conditur hic Baldus Francisci tegmine fultus,

doctorum princeps, Perusina conditus arce.

Qui Baldum iuri negat accendisse lucernam,

ille potest medio sole negare diem.

Nam dudum extinctam haec melioris saecula lucis

opprimerent, radiis sed micat illa suis.

Illa suo auctori tanto speciosior, orbis

fulgida quod mediis luxerit in tenebris.

Postquam Leonardus e vita migravit,

Historia luget, Eloquentia muta est

ferturque Musas tum Graecas tum

Latinas lacrimas tenere non potuisse.