Bezugnahme auf die Grabinschrift

45.2 Elisio Calenzio

Si tibi sit felix et faustum iter,

qui sim, discito paucis, sodes:

Hic ego vates iaceo Calentius,

somno, sapiens, gravi,

donec me tubicen aetheris excitet

vocans ad pias superum sedes.

Legistin? Amabo: Dic abiens: „Vale“.

45.1 Elisio Calenzio

Talia post cineres de me toto orbe legantur

scriptaque sint tumulo carmina digna meo:

„Ingenium natura dedit, Fortuna poetae

defuit atque inopem vivere fecit Amor.“

41.2 Filippo Buonaccorsi („Callimachus“)*

Exuvias praeter pellemque atque ossa Latini

nil hic Callimachi barbara terra tegit.

Illa Borysthenides rapuere tenentque Camenae,

quarum primus amor, gloria prima fuit.

Hoc perfecturus, si copula longa fuisset

venissetque suo iusta propago toro

Sarmatide e nympha, ne barbara terra videri

posset Romanae vel minus apta togae.

Sed mors invidit, qua nil odiosius, atqui

quae feritas tacito non caret opprobrio.

Aeneus est tumulus, mors aenea et aeneus ille,

qui legit haec siccis tristia verba oculis.

37.2 Giorgio Merula*

Cur fugis a titulo? Quo tam cito, quaeso, viator?

Siccine, quod possim carpere, habere times?

Ingenio hoc vixi, fateor, pluresque lacessi

pro rigido exercens scilicet ense stilum.

Parcebam nulli gaudens e caede frequenti

lassa cruentatas figere in ora manus.

Et tu forte times, ne nunc quoque dentibus idem

quaeque Theoninis non placitura petam.

Optarim sane. Neque enim tibi abiret inultum,

Phoebe, sacerdotem sic habuisse tuum.

Nam foedasse suas quod me malus arguit artes –

tutari partes hoc vocat ille suas –

tergendis voluit pueris a clunibus essem.

Quos male mundatos mors inopina rapit.

Ah, miser! At quod idem multi quoque nunc imitantur,

iam successorem mi fore spero aliquem.

52.1 Ercole Strozzi*

Hospes, licet alio propere eundum tibi,

rogo, hoc legas carmen. Scio, miserebere

humanitas, quae est tua. Poetae hic sunt sita

ossa Herculis Strozae, poeta qui satus

patre est Tito. Quod si cupis cognoscere,

qualis poeta uterque, queis honoribus

quantisque praeditus fuerit in patria

quamque inclitis Stroza orta gens maioribus,

longum foret narrare. Id e libris potes

cognoscere, hospes, quos pater, quos filius,

(nam excusi habentur) fecit excultis modis.

Cantavit Anthiam atque Phylloroën pater

quosque tulit heroas familia Estensium

invisaque arma matribus. Lucretiae

hic Borgiae laudes decusque heroidum,

quot sunt, fuere quotque erunt. Hic et deos

canebat et gigantas et bella horrida

ac multa alia, cum rapitur. Heu fata impia,

egisset integram vel aetatem alteram,

non sua minus gauderet hoc Ferraria

quam aut Mantua Marone aut Catullo nobilis

Verona Venusiumve Horatio suo.

Heu ter, quater crudelia, heu fata impia!

Monimentum et ipse exegit aere perennius

utque altius pyramidibus regum, Iovis

quod ira nunquam diruet tempusve edax

aut Aquilo impotens malive ignes, virum

nam sibi dicatum oppetere Pierides vetant.

Sed, mulierum quae est gloria et honos, Barbara

Taurella coniux quam pientissima viro et,

una ut quiesceret, ipsa donec corporum

erit excitatio, sibi hoc viva posuit.

Hoc te volebam scire iamque abi et vale!

38.1 Angelo Poliziano

Hic, hic, viator, paululum gradum siste,

vatem potentis spiritus vides clarum,

qui mente promptus acri et arduum spirans

ac summa quaeque et alta consequi suetus.

Is ille ego Angelus Politianus sum.

Fovit benigno me sinu Flora et illic

in fata cessi, Parthenopeios reges

cum Gallica arma irruerent minabunda.

Tu vale et hoc sis meriti memor nostri.

36.3 Ermolao Barbaro*

Quid stas et titulum stupes, viator,

hoc sub saxo aliquem ratus sepultum

Gallum, Teutonicum, Scotum vel Anglum,

gentes, quas modo barbaras vocamus?

Erras. Barbarus Hermolaus ille,

ille barbarus, utriusque linguae

venus, delitiae, lepor, voluptas.

Quo nemo melius tenebat omnes

germanae numeros locutionis,

hoc sub marmore nunc cinis recumbit.

At non mortuus. Immo mortis ipso

victurus scelere usque et usque et usque,

rumpatur Venetus licet senatus.

At si te novitas moratur huius

vocabli, ratione scito factum,

qua suos domini solent Quirites

insignire duces, ut Africanos,

Cimbros, Pannonicos Isauricosque ,

victarum puta gentium tropaeis.

Sic et barbarie per hunc Latinis

pulsa finibus et iugum subacta

iure Barbarus optimo vocatur.

28.1 Michael Marullus Tarchaniota

Hoc vacuum tibi Pierides statuere sepulchrum

et Graia et Latia, clare Marulle, lyra.

Ipse etenim Aonia in silva atque Heliconis in antris

laetus agens illic otia grata teris.

Illic formosae ludunt ad plectra puellae

et tecum ad choreas carmina lecta canunt

et tibi responsant silvae Peneiaque antra

plaudit et Ogygio roscida ripa lacu.

Nil praeter nomen tumulo per opaca vagaris

culta, per Elysium, docte Marulle, nemus.

Hinc tibi se ad cantum adiungit formosa Corinna

cantat et ad calamos Delia culta tuos.

Illic compositos exercet Cynthia saltus,

exercet raros Lesbia blanda choros.

Nec Parca eripuit, Musae rapuere Marullum,

Arnidi ne fieret grata rapina deae.

Sis felix igitur Musis comes et tua Musae

ambrosio foveant membra adamata sinu.

26.6 Theodorus Gaza*

Ille deum munus – fer tus et liba, sacerdos! –

atque adeo hic linguae Gaza utriusque iacet.

Graecia quem genuit, suscepit Roma, sepultum

communi titulo Graecia Magna fovet.

4.2 Dante Alighieri

Exigua tumuli, Danthes, hic forte iacebas

squalenti nulli cognite paene situ.

At nunc marmoreo subnixus conderis arcu,

omnibus et cultu splendidiore nites.

Nimirum Bembus Musis incensus Etruscis

hoc tibi, quem imprimis hae coluere, dedit.

Bezugnahme auf die Grabinschrift abonnieren