Hexameter (daktylisch)

100.3 Gasparo Contarini

Contarene, tibi pietas dum dia parentat

et queritur longo amissum res publica luctu,

„Ite“, ait, „illustres animae, vitalia saecla

heroum, et vestro athletae exornate sepulchrum

floribus. Hic veris docuit rationibus esse

immortalem animam summa de mente creatam.“

99.2 Giovanni Benedetto Lampridio

Lampridium carum Musis hic Mantua servat.

99.1 Giovanni Benedetto Lampridio

Ergo ego, nobilium o genitrix atque hospita vatum,

Mantua, quod nimium vicina Cremona Maroni

obfuerit, solus poenas abs te ipse reposcor?

Ille soli tantum damnum tulit, ast ego de te,

Mantua, deque tuo meritus bene principe, cara

pro patria et vitam et cineres tibi reddere cogor.

67.1 Christophe de Longueil

Te iuvenem rapuere deae fatalia nentes

stamina, cum scirent moriturum tempore nullo,

Longoli, tibi si canos seniumque dedissent.

94.1 Antonio Tebaldi (Tebaldeo)

Quae ripis te saepe suis stupuere canentem

Eridanus Tiberisque, parens ille, hic tuus hospes.

Credibile est, vates Antoni, nunc quoque campis

te canere Elysiis turba admirante piorum.

47.3 Giovanni Pontano*

Creditus occubuisse Maro secesserat olim,

ut caeli motus labentiaque astra videret.

Mox rediens ad nos Ioviani nomine, terris

quid felix prosit, quid noxia terra minetur,

exposuit nostrisque oculis substravit Olympum.

Scilicet hoc deerat – pecudes, Styga, proelia, turmas

scripserat: extremum votis fuerat aureus axis.

44.1 Galeotto Marzio

Hanc galeam, hunc posuit Galeottus Martius ensem,

Mars, tibi et hanc citharam docto cum pectine Musis,

militia functus decantataque poesi.

34.2 Lorenzo de' Medici

Occidit ut fato Medices Laurentius, ora

convertens in sollicitas Florentia Musas

dixit: „Abite, aliud vobis nunc quaerite tectum!“

Cui Musae: „Nos hospitium sane perdimus usquam

quaerendum. Sed tu Medice, Florentia, rapto

amissum invenies nusquam. Quin desinis ipsa

esse illud decus et Latii, Florentia, lumen.

Nos erimus Musae. Tum, si quid nostra parente

ab Iove dat pietas sperare, videbimus ullo

tempore post heroa deorum in sede suprema

immortalem alti nutu Iovis astra regentem.“

34.1 Lorenzo de' Medici

Nil mortale umquam vita tibi contigit omni,

o patriae pater et decus immortale tuorum,

Laurenti, nisi cum te mors immitis ademit.

Illa quidem non te vitali lumine cassum

extinxit, verum quicquid sanctique bonique

orbis habet, tecum simul abstulit, aurea quando

saecula foedavit scabra rubigine ferri.

Non tamen ulla umquam viderunt tempora dignum

te magis et titulis et maiestate decoro,

cui magnus Cosmus avus et cui filius altum

maximus ille Leo princeps Romanus honorum

atque aeternarum laudum erexere theatrum.

12.4 Antonio Beccadelli

Has tibi dat violas immortalesque amarantos

ingeniorum altrix et Martis alumna, Panormos,

non quia torpenti Musas excire veterno

aut regum immensas potuisti assumere curas,

verum quod Crassos inter ditesque Lucullos

integer, Antoni, voluisti vivere Codrus.

Hexameter (daktylisch) abonnieren