Quid est, quod usquam sit satis mortalibus

sui nec ulla parte cor quod torqueat?

Senex nec absque litterarum gloria

vixi, at malorum hoc est catena longior:

Durisque emuntur litterae laboribus

et sane iniquis efferuntur praemiis.

Fecunda coniunx et domi perstrenua,

sui pudoris proximum est periculum.

Iam bis miser, quod, quid sit educatio,

simulque scirem, quid mali sit orbitas.

Quare, referta cum malis sint…

Musure, mansure parum, properata tulisti

praemia. Namque cito tradita rapta cito.

Arma Pelasgiacas quaterent dum Turcica terras

inveherent culto barbariemque solo:

Quid facerent Musae? Fugere Helicone relicto

Phocin et Ascraeum deseruere nemus.

Regna Latina petunt et erat Musurus in illis.

Hospitio utuntur hospitis ante sui,

nunc etiam bustum grata pietate sepulti

officii quavis sedulitate colunt.

Thespiacas frondes circum et Permessida laurum

…

Lascaris in terra est aliena terra sepultus

nec nimis externam quod quereretur erat.

Quam placidam, o hospes, reperit, sed deflet, Achaeis

libera quod nec adhuc patria fundat humum.

Lascaris hic Graium specimen: Ne crede cadaver

illius esse sub hoc marmore, sed statuam.

Altera quippe fuit Niobe: Dolor impius illam

natorum, hunc podagrae transtulit in lapidem.

Lascarus hic, Graiae doctrinae et nominis heres,

ultimus ex illa gente domoque iacet.

Cum quo lugemus florem periisse Pelasgum

Helladaque ingeniis obsolvisse bonis.

Damna dolenda nimis, sed quae maiora futura,

huius ni pietas advigilasset, erant.

Qui non contentus priscos conquirere libros

Italiam et tantis accumulasse bonis

semine Mygdoniae pubis replevit eandem,

…

Invida clauserunt hoc marmore fata Rodolphum

Agricolam Frisii spemque decusque soli.

Scilicet hoc uno meruit Germania, quicquid

laudis habet Latium, Graecia quicquid habet.

Qui putat ingeniis patriam conferre, Rodulphum

Agricolam Latii dixerit esse soli.

Aut extra Italiam nasci minus esse beatum,

hunc ipsum Frisium, qui putat, esse sciat.

Albertus iacet hic Leo, leonem quem Florentia iure nuncupavit, quod princeps fuit eruditionum, princeps ut leo solus est ferarum.

Quisquis barbarus es rudisque Phoebi,

hoc saxum pedibus cave profanes,

quod sane eximium tegit Leonem

peius angue tuum genus perosum.

Nam Musis sacer est easque secum

vel hic in tumulo moratur oris

docti blanditiis vel ipse cum illis

indagat Clarios comes recessus.

Doctis multiiugam referre praedam

non raro unde solet: stupente Apelle

atque Vitruvio sagacitatem.

Sed quid te dubium morer? Leonem…