Mores, ingenium, Musas sophiamque supremam

vis uno dicam nomine: Marsilius.

Hic situs est, magni sacrum qui dogma Platonis,

Marsilius, patriae tradidit et Latio.

Exuvias tellus, caelestes spiritus oras,

diva sed et terram fama polumque tenet.

Hic, hic Marsilius notissimus ille Ficinus,

totius Ausoniae luxque decusque, iacet.

In parvo ingentes qui clausit corpore dotes,

immo non clausit, sed magis exseruit.

Quare etiam hac parva fama est augustior urna,

ni tamen haec potius, quem replet, orbis erit.

Hanc galeam, hunc posuit Galeottus Martius ensem,

Mars, tibi et hanc citharam docto cum pectine Musis,

militia functus decantataque poesi.

Et galeae et Martis tibi fecit nomina mater, illa novis facibus trita dolisque Venus, ne, si te Mavors rescisset Apolline cretum, vim tibi vel matri saevus, ut est, faceret. Proinde nec est mirum, si vincis utraque palaestra estque tibi nivei copia tanta salis, quem voluit mater tinctum sua olente saliva et pater ornatum munere uterque suo.

Talia post cineres de me toto orbe legantur

scriptaque sint tumulo carmina digna meo:

„Ingenium natura dedit, Fortuna poetae

defuit atque inopem vivere fecit Amor.“

Si tibi sit felix et faustum iter,

qui sim, discito paucis, sodes:

Hic ego vates iaceo Calentius,

somno, sapiens, gravi,

donec me tubicen aetheris excitet

vocans ad pias superum sedes.

Legistin? Amabo: Dic abiens: „Vale“.

Elisius tenere teneros dum scribit amores,

durare ad senium, tam tener, haud potuit.

Sed nec erat dives nec mirum in vate: Negatas

spernit is ancillas aut facit artis opes.

Ignoscit Collenucio tyrannus,

mox illum necat. O scelus nefandum

vincens saevitiam Neronianam!

Esto: Tyrannus strangulavit impia nimis, heu, apertum fraude Collenucium. Illumne, o hospes, an magis se perdidit? Sua ille vivit claritate in litteris actaeque vitae nobili praeconio. At iste tali morte vivens concidit, quod nunc mori, ut nec vivere olim, non liceat, illius utrumque praestruente gloria. Proinde verum si tacere nolumus: Non vim tyrannus intulit, sed passus est. Quae laurea illi prorsus est clarissima.