Hic Picus iaceo atque me illa, quae iam

ante non potuere, nunc iniquo

me servant obitu arma litterarum.

Aegre illud fero concidisse dextra

fratris filii. Hoc elevor me adeptum

vitam pro studiis meis perennem.

Apagete vos, philosophiam qui tetricam

putatis et boni indigam

leporis ebriae horridamque Cypridis.

Quid? Niphus an non melleus

perplexa suetus inter enthymemata

et syllogismos frigidos

narrare suaves atticasque fabulas

multumque risum spargere?

At quam venustum hoc, septuagenarium

quod undulatis passibus

et curioso flexuosoque capite…

Philippus ille candor, ille et optimus

sophos iacet lapisque candidissimus

tegit, tegit Bononiae, Bononiae

iubar. Viator, asta et inspice, inspice.

Mane, mane, Philippus ille te obsecrat,

rogat, preceris omnibus sacrum omnibus,

qui iter dedit, dedit. Lapis quoque obsecrat,

preceris, ut rogi leves eum opprimant.

Quisquis Averroem censes habuisse cerebrum,

falleris: Haud est me passus habere meum.

Regula non fallit: Propter quod quodlibet unum

taliter affectum est, sed magis illud erit.

Trunca fides, lugent Charites, periere lepores,

desipuere sales, desipuere ioci.

Lurida nimirum Mors, quae urbi invidit et orbi,

Divitium immiti funere corripuit.

Purpureos meruit titulos. Romae occidit, ortus

est Bibiennae. Hoc te scire sat, hospes, erat.

Posthumus hic situs est. Ne dictum hoc nomine credas,

in lucem extincto quod patre prodierit.

Mortales neque enim talem genuere parentes:

Calliopea fuit mater, Apollo pater.

Dum gravis incumbit saevos Aquivivus in hostes

vincendique aperit dextra animoque viam,

contigit interea lustrantem castra Gradivum,

arma ubi penderent – non sua – ferre pedem.

Solvit, pertentat: Vocis modulamine captus

perstitit invitam sollicitare chelyn,

at veritus Dominum mox hostibus adfore fusis.

„Ille quidem vincat, sed capiatur.“, ait,

„Quid, vesane, tibi pro talibus imprecer…

Paene adiisti ingens famae, Catanaee, periclum,

sic insciis sodalibus

qui fato eriperis studiorum creditus illis

partu propinquo quaerere

secessum. Idque satis fuerat conquesta Minerva.

Quam sic Apollo reppulit:

„Haeccine“, signabatque libros, „monumenta vel omni

perenniora marmore?“

Qualis Alphei liquidos ad amnes

sive Maeandri viridante ripa

concinit serum moriens in ipso

funere cygnus,
 

talis ad plectrum ad thiasos deorum

ludit in caelo Marianus, ipsa

morte victurus Marianus, ipso

funere felix.

Ipse sis felix faveasque nobis,

ipse ades fessis, Mariane, rebus.

Tu preces audi miserorum et iras

siste Tonantis.

„Quis iacet hic truncus? Cuius caput ense recisum est – Hospes.

et natat in taetro sanguine canities?“

„Hic est ille Thomas Morus. Sic fata rependunt             – Civis.

tristia multa bonis et bona multa malis.“

„Quae circumsistunt divae lugubre cadaver?“     – Hospes.

„Diva tenax veri, sancta Fides, Nemesis,            – Civis.

harum prima odii causa et fuit altera mortis,

ultrix iniustae tertia…