Effert, Pomponi, dum te Romana iuventus

et fovet in gremio Roma beata suo,

fama est invidiam summorum adeoque deorum

hunc tumulum, hos gerulos conciliasse tibi.

Sed tamen hoc summi tibi debebatur honoris,

ut tua mors superis invidiosa foret.

Ingenia et mores vitasque obitusque notasse

pontificum, argutae lex fuit historiae.

Tu tamen hinc lautae tractas pulmenta culinae.

Hoc, Platina, est ipsos pascere pontifices.

Quem non res hominum, non omnis ceperat aetas,

scribentem capit haec Coccion urna brevis.

Vivens corona nobilis iuventutis

circumdabaris undequaque, Demetri,

dum ostenderes iter per Atticos campos.

Certe beatus, si obtigisset morienti

doctam videre tibi superstitem prolem

oculumque claudi languidum a tuis natis

aut hoc sepulchrum lacrima illorum spargi.

Hospes, licet alio propere eundum tibi,

rogo, hoc legas carmen. Scio, miserebere

humanitas, quae est tua. Poetae hic sunt sita

ossa Herculis Strozae, poeta qui satus

patre est Tito. Quod si cupis cognoscere,

qualis poeta uterque, queis honoribus

quantisque praeditus fuerit in patria

quamque inclitis Stroza orta gens maioribus,

longum foret narrare. Id e libris potes

cognoscere, hospes, quos pater, quos filius,

(…

Donate, divum munere

fudisti ut orbi nectaris,

quantumque manat gratiae

divino ab ore caelitum,

servasti et exul patriam.

Quisquis barbarus es rudisque Phoebi,

hoc saxum pedibus cave profanes,

quod sane eximium tegit Leonem

peius angue tuum genus perosum.

Nam Musis sacer est easque secum

vel hic in tumulo moratur oris

docti blanditiis vel ipse cum illis

indagat Clarios comes recessus.

Doctis multiiugam referre praedam

non raro unde solet: stupente Apelle

atque Vitruvio sagacitatem.

Sed quid te dubium morer? Leonem…

Occidis aetatis media quod, Pice, iuventa,

ultima Socraticae flenda ruina domus.

Nec vel nobilitas vel opes vel gratia formae

profuit aut animi tot bona rara tui.

Non hoc, crede mihi, naturae iniuria matris,

larga vel imprimis quae fuit una tibi,

sed vitae documenta hominum et quam fluxa sit ollis

forma, genus, dotes ingenii, imperia.

Hic situs est, magni sacrum qui dogma Platonis,

Marsilius, patriae tradidit et Latio.

Exuvias tellus, caelestes spiritus oras,

diva sed et terram fama polumque tenet.